گەڕانەوە بۆ فڕین

زۆر له‌ مێژبوو چاوه‌ڕێی هاتنه‌وه‌ی ده‌کرد، ئاخر ده‌مێک بوو ته‌نهای کردبوو.به‌ڵێن وایه‌ به‌م نزیکانه‌ بێته‌وه‌!! هه‌موو خه‌یاڵ و بیری لای هاتنه‌وه‌ی بوو، که‌ بێته‌وه‌ چۆن پێشوازی بکا؟ ڕاکات و له‌ ئامێزی بگرێ یا ته‌نها، به‌ سانایی  باوه‌شێکی بۆ بگرێته‌وه. تیامابوو له‌ پێشدا بۆنی کوێی هه‌ڵمژێت قژی ، یا هه‌ناسه‌ی؟  بیری ده‌کرده‌وه‌ هه‌ر یه‌کسه‌ر دوای گه‌شتنی بیباته‌‌ ئه‌و باخچه‌یه‌ی که‌ به‌ر له‌ سه‌فه‌ره‌که‌ی سه‌وزترین و ڕه‌نگاڵه‌ترین ژوانگه‌یان بوو.  ئا ئا ده‌یباته‌ ئه‌وێ.   پاش که‌مێکی که‌ بیری ده‌هێناو ده‌برد: ئه‌ی ئه‌گه‌ر یه‌کسه‌ر بگه‌ڕێینه‌وه‌ ماڵه‌وه‌ و ئه‌و گۆرانییه‌ی بۆ دانێم که‌پێکه‌وه‌ دوو گوێگری تا ناخ به‌هه‌ستی بووین. ئا ئا ئه‌مه‌یان ده‌که‌م دێینه‌وه‌ ماڵه‌وه‌.  ده‌هاتو ده‌چوو به‌ ماڵه‌که‌دا نه‌یده‌زانی چی ده‌کا! ئه‌ی ئه‌گه‌ر که‌مێیک به‌شاردا بگه‌ڕێین و دیمه‌نی شاری بهێنمه‌وه‌ به‌ر چاو چۆن ده‌بێت؟  ئه‌و شاره‌ی بێشکه‌ی یه‌که‌مین دیده‌نییان و هێز به‌خشی ئه‌و هه‌سته‌یان بوو که‌ مه‌گه‌ر به‌س خۆی و شار و ئه‌و بزانێت پێناسه‌یکات.  هێشتا هه‌فته‌یه‌کی ماوه‌ بۆ ڕۆژی گه‌ڕانه‌وه‌ی به‌ڵام ئه‌م فریای بیرکردنه‌وه و بڕیاردان ناکه‌وێ به‌و ماوه‌ که‌مه‌!  ئاخرئه‌و کاته‌  بۆ ئه‌م که‌مبوو ئه‌م له‌ کاتژمێرێکدا ده‌یان بیری به‌خه‌یاڵدا ده‌هات و ده‌ڕۆشت نه‌یده‌زانی کوامیان هه‌ڵبژێرێت. هه‌موو بیر و یاده‌وه‌رییه‌کی شیرین و سه‌وزیی له‌خۆیدا هه‌ڵگرتبوو. 

 ئه‌و پیاوێک بوو له‌ باران، که‌ دایده‌کرد هه‌رچی گه‌ردی ڕابردوو  و ئێستا‌ش هه‌بوو ده‌یشته‌وه‌، ئه‌و  باڵنده‌یه‌ک بوو له‌مێژ بوو به‌ فڕین ئاشنابوو. سینه‌ی  پێده‌شتێکی ئه‌و شاره‌زووره ‌بوو. چاوه‌کانی  دوو ڕه‌شی هێند تۆخبوون له‌ تۆخیدا ده‌بریسکانه‌وه‌ و گزنگیان ده‌دا.  ئه‌م کچه‌ کورده‌ تامه‌زرۆی خۆی بۆ بۆنی خاکی ئه‌وێ ته‌نها له‌ بۆنێکدا ده‌بینیه‌وه‌ که‌  تاکه‌ سوکناییه‌ ، ئه‌ویش بۆنی سینه‌ی ئه‌و بوو!

21:16 - 10.8.2006 - ناردنی کۆمینت